YMA DAY VAWI 84-NA THANGLAILUNG A LAWMNA NI14.6.2019 ZAN – ZO ZANA WELFARE AIAWH THUSAWI

Sawitu : Lalbuatsaiha, Secretary PTWA

A hmasain, Day pa VCP leh YMA hruaitute leh Welfare aiawha kalte leh YMA member te invaiin chibai u. Thusawi turin Chairman a awm tawh a, tun tumah hetiang hun min pe leh ang tih ngaihna kan hre lo hle a, a lawmawm a, a huphurhawm bawk si, thian ka nawr tlu zo si lo a, nang sawi mai rawh min tih takah chuan, inpuahchah lawk lem lo in ka rawn sawi ve dawn ta a ni. Thusawi hi thiam loh a leiah rei tak sawi a awl hle mai a, a rei palh chuan min lo hrethiam dawn nia.

YMA Day hmang tura YMA Thanglailung Branch atanga sawmna kan hmuh phat khan, kan phur tlang hle a. Committee hmanhmawh kan nei a, chuta kalte chuan kal kan tum vek a, mahse rokhawlhna avangtein a then chu an kal ta lo chauh zawk a.

1.         Welfare anga kal kan chak em em bakah, keimah hian kal chak chhan tam tak ka nei ve a, chung zinga tlem han sawi ila –

a)        Thanglailung hmun hi kan lal Awksarala lal tanna hmun a ni, kum 1911-ah helaiah hian a lal tan a nih kha.

b)        Thanglailung hi mi bik te lo chet tlatna leh lu nghahna hmun a ni. Thanglaia te bakah Buh tuh leh hlo thlawh chak hmingthang Pakawha lu nghahna hmun a ni a, Hnang hlai leh Em tah chak hmingthang Pu Saithanga awmna khua a ni bawk.

c)         Zaithiam leh Lam thiam tamna a ni. Kan zaithiamte leh lam thiamte hi, tun hma atangin an thiam zia ka lo hre ve tawh, chutiang nena hun hman chu a chakawm a ni. 

2.         Thanglailung hi khaw changkang a ni:

a)        Hetiang YMA Day leh puipun nikhuaah hian mipui lamin awm dan an thiam tlat zel. Zaithiam emaw Lam thiam emaw ten chanvo an neihin, mipui ten an tawiawm tha thin hle. Lam thiam lo lam pui te, zaithiam lo zaipui a lo phurpui hi a changkang tlat. Hetiang kawngah hian khawchangkang tak kan ni.

b)        Tv Lalduhzuala (Vohbik), a phurna zawng tak Zai (solo) tura chanvo siam sak a ni leh a zai laia mipuiin kan phurpui dante kha, a changkang a ni. Thangteeka kan hria a, kan nu leh pa ten an duat em em a, an hming pawh a tha a, chutiang chu min ti hre chhuak. Rualbanlote enkawl thiam hi changkanna a ni.

c)         YMA ten Mitthi chhungte Thing an phurh saka, an eh sak thin tihte kan lo hria a. Kan chin dan than ni miah lo mahse, a tha tur ni a hria a YMA hruaituten hetiang tih nachang an hria hi a lawm awm. Kum tam tak liam hnuah chuan a tul tawh lo mai thei, mahse tunah chuan chin dan tha leh tangkai tak a ni. Culture kan tihte pawh hi kan hnam a than an zela thang ve a ni a, chuvangin a tha tur lamah chu kan entawn ve zel mai tur a ni.

3.         Thanglailung  hma lam hun hi a eng a ni:

Kan hriat ve chinah, Thanglailungah hian thalai fel tak tak an awm a, a bik takin Aizawl a TSU awmte an fel em em tih a takin ka hria. TSU te hian Infuihtharna hun an hmang thin a, kan tel ve tawh. “Assembly” tih te “Conference” tihte “Meet” tihte hmang lo a INFUIHTHARNA HUN an ti kha a tha a, a hming atang khan kal a chakawm nghal ka ti. Kan zirlaite hi Phullen SU lam hian kan tluk lo em aw a tih theih. Heng thalai fel tak tak vang hian Thanglailung hmalam hun hi a eng in ka hria.

4.         Thil tih ho dial dial kan hrat a, tanrual tak tak thiam kan mamawh:

Mizote hi a huhoa thil ti thin, Dam leh tlang khatah, thih leh ruam khatah tia lungngaihna leh hlimna intawm tawn thin kan ni. Hman lai chuan Chapchar kutte pawh ni 3 atanga ni 7 zet te hmangin khawtlanga inlungrual taka thiltih an uar hle. Khaw pakhatah phei chuan Chapchar kut kha an hmang rei lutuk a, Vakiin Buh vui khuaah a rawn pu lut hial an ti.

Chutiang taka hlim taka thil tiho dial dial thin chu kan ni na a, Mizo te hian hmasawnna tur kan la nei ni a ka hre thin a, chu chu Tanrual tak tak thiam hi a ni. Veng leh veng bil in ernate, Party leh party in ernate, Kohhran leh Kohhran in er tlatnate hi kan hnualsuat a ngai. Tun hma chuan, Veng leh veng iner vanga khawtlangin kan neih tur Sorkar office leh hmun pawimawhte kan neih loh phahte pawh a awm thei a ni awm e. Hengte hi keini khawtlang chuan ti ve lo ila, khawtlang huap zelin rilru i pu ang u. Hmasawn tur tak tak phei chuan, kan khawtlang chauh chuan thil tih a harsat chang a awm thin a, kan thenawm khuate nen pawh kan tanrual a, a bial angte a kan tanrual thiam hi a tul tak zet a ni.

5.         Social Media hi i hmang tangkai ang u: Social media a lar hle a, heng hi tawng dik zir nante, chanchin puan zar (Reports) zir nan te, thuziak zir nante, thu thar in hrilh nante i hmang tangkai ang u. Mobile phone tha tak takte hi Whatsapp leh Facebook atan chauh hmang loin, thil dangah, kan zirlai puitu atante, kan khawtlanga Zaithiam leh Lamthiam tak takte,khawvel hmuha phochhuah nante i hmang tangkai ang u.

Sawi tur tam tak a awm, YMA Thanglailung Branch in YMA Day hmang tura Phullen & Thanglailung Welfare Aizawl te min sawm hi, thinlung takin kanlawm a, lawmthu kan sawi a, hun lo awm leh zel turah Thanglailung Branch YMA te duhsakna sang ber ka hlan e.