YMA DAY VAWI 84-NA LAWMNA THANGLAILUNG A PTWA CHAIRMAN PU LALRAMMAWIA THUSAWI

A hmasain kan VCP leh YMA hruaitute leh Welfare Aizawl lam atanga lo kalte leh helaia lo kal zawng zawngte in vain PTWA hmingin chibai ka buk a che u.

Thanglailungin YMA day hmang tura min sawm hi, kan rilruah a tla nah le a, committee an kan han rel chu, a then phei chu rel zawh khan kal nghal mai duh rum rum khawpin kan phur a ni. Hetianga min sawm hi kan lawm tak meuh a ni.

Hman ni ADFA Cup champion lawmna Phullen ah pawh khan, Thanglailung lam lo va sawm ve ula tiin ka han hrilh a, mahse an lo sem ta lo che u a ni mai thei. Kan lo chhoh laia ka rilrua awm chu, YMA day hi Phullen lam hian an lawm dawn lo a ni mai thei a, Thanglailung YMA hruaitute hian Phullen lam hi va sawm se a tha awm mang e aw ka ti a.

Thil tha duh, tlawm hreh lo, tlawm thinhote kha mipuitling, mi tluang an ni thin. Inremna tur awmtheihna duh lo a, harsatna siam thinte, boruak tha lo duh tlat thinte hi mi tluang an awm ngai kei chuan ka hre lo. Chuvangin remna hi keini chuan kan dah pawimawh a tul hle.

Phullen lam a kan unaute nen, naupang inkarah emaw boruak neuh neuh a lo awm palah a nih pawhin, a mihring tlemzawk ni mahila, kan khawtlang hruaituten, a puitling zawk chan changa a dawh thei zawk leh remna siamtu zawk in nih theih ngat chuan, kum rei lote ah Phullen lam chuan an chung en vat ang che u tih a chiang a ni.

Chuvangin, remna siamtu Pathian duh zawng anga awm tlattu, min rem lotu an awm pawha remtu nih kha, mi puitling, mi fel, hmalam huna malsawmna dawn theihna a ni. Chung chu thil tha nia ka hriat avangin, helaia khawlang hruaitu leh mipui lo kalte hmaah ka sawi duh a ni.

Hmasawn tur hian mihring tamte pawh a ngai thin a, tum khat chu Phullen PHC tan Ambulance kan bil a, mahse dan ang taka Ambulance nei tur chuan mihring mi singnga lai awm tlin a lo ngai a lo ni a, chutiang chuan mihring tlem lutuk hian development-ah harsatna a siam thin a,  chuvangin keini khua Phullen te leh Saitual nente pawh inlungrualna kan siam zel angai a ni.

YMA hi ka ngaisang hle a, kan ramah tlawmngaihna tlakhniam thute kan hre thin a. Ramhlun vengah kan awm a, member zat ka hre mai lo a, Civil Pensioner pawh mi 250 chuang kana wm a ni. Mahni han insawi ila, Pathian zarah eizawnna vangin zoram dung leh vang bakah state pawn thlengin ka fang nasa a. Tlawmngaihna kawngah pawh, state pawna harsatna tawk tanpui pawh ka nei ve thin. Nula leh tlangval chaw eina nei lo ka pek sak pawhin, lawmthu sawi pahin chanchinbua chhuah turin ka hming min zawt a, mahse “Chutiang tura pe che u ka ni lo, ka Pathian rawngbawlna ah ka ngai ve a, tih theih tlem mahse ka nuam tih ve zawng a ni” tiin ka hrilh a.

Ka pension hunah pawh Thlan laihnaah kal thin ka tum ruh hle a, kum 60 kan ni a, mahse YMA tlaivar mitthi lumen te thlak turin ka kal ta thin zawk a. Tlem lai khan kan veng Ramhlun North ah khuan mi 68 vel kan thi a, chu mi zinga mi 65 ah chuan zing dar 4, 5 velah ka kal thin. Chutiang chuan kei ni Thanglailung khuate, mite entawn tlaka kan awm a pawimawh in ka hria.

Rinawmna kan neih a Pathian kan tih tlat chuan, Aizawl a mihausate nih ang hi kan ni thei vek a ni. Kei hi ka lo fing lo em a, an nih ang ka ni lo mai chauh a ni. Kan nun a dik a, kan fel a, Pathian tihna nen chuan mi nihna ang hi kan ni thei vek a ni. Tlawmngaihnate hi a sawi a sawi loin, a taka nunpui itum zel ang u. Kan ramah hian a taka nunpui thin aiin a sawitu hi kan tam a, Pahtian thuah pawh, mi sawi ngai loh, mi ngaihnawm tih tur kan zawng nasa a, mahse ringtu tha tak kan tlem ta hlein a hriat. Keini khua chu, Kristian awmna hmasa kan ni tih hria ila, Pathian tihna nen kan hunk an hman chuan Midangte tan malsawmna leh keimahni tan hlawkna a ni dawn a ni.

Tin, aia upa zahna hi kan ngaihpawimawh a tul. Ka awmna apianga aia upate hnuaichhiah loh leh an rilru natna tura awm loh hi ka tum tlat a ni thin. Kan tawhna Transport deptt ah Driver tam tak kana wm thin a, zu ruih vanga motor khalh thei tawh lote leh motor khalh tlak lo senior tak tak, kan hotuten na tak taka an tawng khum thin an awm thin. Chutiang mite pawh chu ka hmusit ngai lo a, a fiamthu pawhin ka be chhawhchhi ngai lo, kei aia upa an nih chuan nu leh pa angin ka zah thin, chu chu Pathianin masawmna a ni tih vawiinah min hmuh tir a ni. Kan khua a thalaite, kan nu leh pa, pitar putar, thalaite pawh, kan aia upa an nih chuan i zah ang u, chu chu Pathian malsawmna a ni.

Kan ram awmdan kan hria a, kan khaw TSU te an fel ka ti a. Phullen SU nen kan thlir kawp thin a, TSU chu sang taka an awm, Phullenin an phak lo a ni. Hetianga, aia upa zahna leh Pathian tihna nen an kal zel chuan, Phullen lam chuan an chung en vat ngei ang. Mahse, kan lo chungnung a nih a, kan lo chapo a, midang rilru natna tura kan lo tawng te a nih erawh chuan, chu chuan kan boruak a ti chhia anga, khawtlang a nghawng dawn a ni.

A huhoa kan awm laite, a fala kan awm laite hian, pawisa eiruk tur a awm a nih pawhin, ruih hlo tih ruk tur a awm a nih pawhin leh nulat tlangval kawngahte pawh, a ruka thil tih tur a awm pawhin Pathian kan tih tlat chuan Pathianin kan hmalam hunah Lei malsawmna min pek a tiam a, mi tam tak malsawmna a pe tawh a, kan tan Pathian hi a rinawm ve tho a ni tih i hria ang u.

Hei PTWA ten kan tih theih tawk a tlem a, mahse, kan inlungrual em em a, mi ten min sawiselin min tihchhiat tum mahse, kan inkar boruak a tha a, tihngaihna an hre lo ang. Khaw tam tak pawhin PTWA ang nih ve hi an chak thin a, mahse a sawi a sawi a ni lo a, a taka thawh chhuah a ngaih avangin tam takin an thei thin lo. Tunah hian kan inlungrual a, mi pawi sawi kan hlau a, mite tana harsatna thlentu nih kan hlau a, kan theihna vang ni loin Pathian malsawmna kan dawng a ni. Hun lo kal zel turah pawh a siamtha tu ni zel tur leh a tichhe tu nih hlau tak chunga he PTWA lungrualna hi a chhiat mai loh nana min venpui turin ka sawm che u a ni.

PTWA hian sum lamah harsatna kan nei ve zauh thin a, mahse mi awm thei deuh leh mi inphal ten sing chuang ten min tanpui thin a, kuminah pawh Member fee khawn loin kan la awm thei a ni. Hengte hi mi in lawmpui ve ka ring. Khu lamah inrem tha hle mah ila, helamah boruak tha lo a awm palh te hi kan hlau hle a, kan naute zingah boruak tha lo a lo awm palh pawhin, a puilting zawk leh u zawk chan change remna siamtu zawk in nih theih zel ka beisei a ni.

Nimin lamah Pathian hnenah ka tawngtai a, boruak tha tak min pe a, tluang taka hun kan hman theih nan leh tluang taka kan haw theih nan ka dil a, tihian hun nuam tak kan hmang ta a. Zanriah eikhamah kan haw leh dawn a, min lo tawngtai pui zel dawn nia. YMA vul zel rawh se.